සිංහල යුනිකේත – මාර්ගගත තාක්ෂණික පුහුණු සැසි

දේශීය භාෂා තාක්ෂණික සහාය මධ්‍යස්ථානයෙහි අරමුණුවල සඳහන් කර ඇති පරිදි, යුනිකේත පුහුණු වැඩසටහන් පැවැත්වීම අපගේ මූලික කාර්යයකි. උපකාරක මධ්‍යස්ථානය ප්‍රධාන කාණ්ඩ දෙකක් යටතේ පුහුණු සම්මන්ත්‍රණ සංවිධානය කරයි. එනම් සිංහල යුනිකේත සඳහා අවශ්‍ය මූලික හැඳින්වීම සහ තාක්ෂණික දැනුම  ලබා දීමයි. සිංහල යුනිකේත සඳහා මූලික හැඳින්වීම යටතේ සිංහල විජේසේකර යතුරුපුවරුව පිළිබඳවත්, අනෙකුත් ආදාන මෙවලම් පිළිබඳවත්, සිංහල විදැහුම්කරණය සහ තාක්ෂණික දෝෂ සම්බන්ධ ගැටළු පිළිබඳවත් ආවරණය කරයි. දේශීය භාෂා තාක්ෂණික සහාය මධ්‍යස්ථානය විසින් පසුගිය වසර දෙක තුළ මූලික හඳුන්වාදීමේ සැසි කිහිපයක් සිදු කරන ලද අතර එය විවිධ සංවිධාන සඳහා සිදු කරන ලදී. පොලිස් දෙපාර්තමේන්තුව, ලංකා බැංකුව සහ සමස්ත ලංකා බෞද්ධ මහා සම්මේලනය එම සංවිධාන අතර වෙයි.

Covid-19 වසංගතය අතරතුර, දේශීය භාෂා තාක්ෂණික සහාය මධ්‍යස්ථාන මෙම පුහුණු සැසි තාවකාලිකව  සිදු කිරීම නැවැත්වීය. ඒ වෙනුවට එය මාර්ගගත වෙබිනා (webinar ) ආකාරයෙන් සිදු කරන ලදී. සිංහල යුනිකේත සමඟ දත්ත සමුදා කළමනාකරණ පද්ධතිය සමඟ වැඩ කරන ආකාරය, විදැහුම්කරණ ගැටළු නිරාකරණය කරන ආකාරය, දත්ත සමුදායන් හැර වෙනත් පෙළ ගොනු වල සිංහල දත්ත ගබඩා කරන ආකාරය සහ වර්ග කිරීම යනාදී මාතෘකා කිහිපයක් ආවරණය කරමින් හර්ෂ විජයවර්ධන මහතා විසින් අන්තර්ජාලය හරහා තාක්ෂණික සම්මන්ත්‍රණ මාලාවක් ආරම්භ කළේය. පසුගිය මාස තුන තුළ වෙබිනා(webinar ) සැසි තුනක් පවත්වා ඇත. සිංහල යුනිකේත වල හඳුනාගත් දෝෂ නිවැරදි කිරීම සඳහා දේශීය භාෂා තාක්ෂණික සහාය මධ්‍යස්ථානය අදාළ සංවර්ධකයින් සහ නිෂ්පාදකයින් සමඟ සම්බන්ධ වේ. එම ගැටළු පිළිබඳව ඔවුන් දැනුවත් කිරීමට පෙර, දේශීය භාෂා තාක්ෂණික සහාය මධ්‍යස්ථානය එම ගැටළු පරීක්ෂා කර ලේඛනගත කිරීම සිදු කරයි.